गीत

गीत श्रृंगार 

(मुखड़ा)

तोर होंठ के लाली हाय-

तोर कान के बाली हाय-

तोर होंठ के लाली 

कान के बाली..बेनी मा मोंगरा के फूल ओ अलबेली दिवानी..

करेजा ल मारा थे ओ हूल..

करेजा ला मारथे ओ हूल...

अंतरा-1

खनर खनर ओ चूरी कंगना,

पांव  के पैरी झनके।

तोर बेनी के गजरा दौना,

महर महर ओ महके।।2

(चढ़)

हिरनी जइसे रेंगना गुंइयां-2

(पटक)

चाल हवय मतवाली..

तोर होंठ के लाली हाय

तोर कान के बाली हाय

चूंदी हा चंदैनी के रात ओ मनमोहनी दिवानी,,

नीक लागे तोर गोठ बात,,,

अंतरा-2

लाली लुगरा बेनी फुंदरा,

माथ म टिकली चमके।

कंचन जइसे काया गोरी,

रूप रंग हा दमके।।2

(चढ़)

तोर रूप के होवय चंदा-2

(पटक)

गांव गली मा चाली,,,

तोर होंठ के लाली हाय,

आँखी के कजरा कटार ओ अलबेली दिवानी,,

अंग-अंग बरखा बहार..

अंग-अंग बरखा बहार,,,

अंतरा-3

सजना संवरना मुच मुच हंसना,

लेवत हावय चैना।

मन ला लुभावय कोइली जइसे,

गुत्तुर हे तोर बैना।।2

(चढ़)

रूप मोहिनी जादू मंतर-2

(पटक)

अब्बड तैं दिलवाली,,

तोर होंठ के लाली हाय

तोर कान के बाली हाय,

गर मा हे सोनहा के हार ओ मनमोहनी दिवानी..

चाल रंगरेली कचनार...

चाल रंगरेली कचनार...

गीतकार 

डी.पी.लहरे 

बायपास रोड़ कवर्धा