मोर सपना

गीत ..
सपना..

मोर सपना मा आये,तोला कइसे भुलावँव ओ..
सोय निंदिया ला जगाये,तोला कोन मेर पावँव ओ..2ll

सुरता तोरे लमाये,मन मोर नाचे गाये..
मन मा तहीं समाये,सपना रोज देखाये..2ll1
खटिया मा जागे जागे,तोर गुन ला गावँव ओ..
मोर सपना मा आये,तोला कइसे भुलावँव ओ..

तँय सुनले मोर कहानी,मोर तड़पत हवय जवानी..
मोर सपना के रानी,आँखी ले बोहय पानी..2ll2
मन के पीरा ला जोही,मँय कोन ला देखावँव ओ..
मोर सपना मा आये,तोला कइसे भुलावँव ओ..

का तोला ओ सपना आथे,का मोर सुरता सताथे..
कभू मया पीरा हा जनाथे,कभू आँखी आँसू बोहाथे..2ll3
दे दे जवाब तँय हा गोरी,मँय तोला मनावँव ओ..
मोर सपना मा तँय आये,तोला कइसे भुलावँव ओ..
सोय निंदिया ला जगाये,तोला कोन मेर पावँव ओ..2ll

शब्द रचना
डी.पी.लहरे
बायपास रोड कवर्धा
दिनाँक 15-01-19