Dplahre.com

गीत... नायक+नायिका मन के मंदिर मा राखेंव तोला. देवी जइसे ओ पूजेंव तोला.... तोर नाँव हा लिखाय हे, मोर दिल के दीवार मा... मन के मंदिर मा राखेंव तोला. देवी जइसे ओ पूजेंव तोला.... अंतरा-(१) नायक सागर मा जतका पानी हे संगी, ओतके मया तोला करथौं। नायिका बादर मा जतका जोगनी हे संगी, ओतके मया तोला करथौं।।-2 नायक तोर नाँव हा लिखाय हे मोर दिल के दीवार मा... मन के मंदिर मा... अंतरा(२) नायिका गीता रमायन जइसे रे साथी, निशदिन तोला मैं पढ़थौं। नायक कुरान पुरान बाईबिल जइहे तोला मयारू मैं पढ़थँव।। तोर नाँव हा लिखाय हे मोर दिल के दीवार मा... मन के मंदिर मा... गीत डी.पी.लहरे"मौज" बायपास रोड़ कवर्धा छत्तीसगढ़

गीत.. तोर नैना मा... तोर नैना मा जादू भरे हे.. मोर हिरदे ला काबू करे हे..2 तोर सँवरेगी हाय पतरेंगी.. दिल दिवाना हा पाछू परे हे-2 तोर नैना मा... तोर नैना मा जादू भरे हे.. मोर हिरदे ला काबू करे हे..2 अंतरा(१) सुरुज मुखी कस लागय,मुच मुच तोर मुस्काई। चाँद घलो शरमावय,देखे तोर सुघराई। बोली मा तोर ए मोर चंदा- किसमिस काजू झरे हे-2 तोर नैना मा... तोर नैना मा जादू भरे हे.. मोर हिरदे ला काबू करे हे..2 रूप नगर के ओ रानी,तोर गजब हे माया। सुरुज बरोबर चमके,कंचन हे तोर काया।। हाय मोर मैना देख फुलकैना- तोर राजा हा आगू खड़े हे-2 तोर नैना मा जादू भरे हे.. मोर हिरदे ला काबू करे हे..2 डी.पी.लहरे"मौज" कवर्धा छत्तीसगढ़

विरह गीत... *नायक* गुनत रइथौं मैं दिनरात,मोर मया ल ओ भुलाके तैं *नायिका* कब होही संगी मुलाकात,मोर मया ल तैं भुलाके रे। *नायक* *चढ़ान*-जिंवरा हा कलपत हावय देखे बर तोला ओ-2 *पटक* कर डारे गोरी तैं बेहाल,मोर मया ला ओ भुलाके तैं गुनत रइथौं..... अंतरा(1) *नायक* तोर बिन मैं कइसे राहँव,मुश्किल हे जीना ओ.. *नायिका* आँखी के आँसू होगे,छिन-छिन  मा पीना रे... *चढ़ान* जिंवरा हा कलपत हावय देखे बर तोला रे-2 *पटक* का करौ पीरा के बखान,कइसे मैं पीरा ल दिखावँव रे... गुनत रइथौं.... अंतरा(2) *नायक* बादर के चंदा जइसे,कहाँ लुकागे ओ *नायिका* सुवा परेवना जइसे,कहाँ उड़ागे रे *चढ़ान* जिंवरा हा कलपत हावय देखे बर तोला रे-2 *पटक* तोर बिना होगें हँव परेशान, का मोहनी मया के खवाये तैं गुनत रइथौं... अंतरा(3) *नायक* संसो मा रे संगवारी,चोला हा चूरत हे *नायिका* ए तन हा रे निरमोही,माटी कस घूरत हे *चढ़ान* जिंवरा हा कलपत हावय देखे बर तोला रे-2 *पटक* अब चाही संगी रे तोर साथ,तन मन मा मोर तैं समाये रे.. गुनत रइथौं.... गीतकार डी.पी.लहरे"मौज" कवर्धा छत्तीसगढ़

करमा ताल सैड सांग कहूँ तँय मोला छोड़ के जाबे रानी रे.. पछताबे रानी रे पछताबे रानी रे.. मोर सहीं मयावाला तैं  दिलवाला.. कहाँ पाबे रानी रे... कहाँ पाबे रानी रे.... कहूँ तँय मोला छोड़ के जाबे रानी रे.. पछताबे रानी रे पछताबे रानी रे.. अंतरा(1) दिल ला खिलौना समझे,का होगे तोला ओ। आँखी मा आँसू देके,छोड़े तँय मोला ओ।।-2 मोर सहीं मयावाला तैं  दिलवाला.. कहाँ पाबे रानी रे... कहाँ पाबे रानी रे.... अंतरा(2) तँय मोर हीरा मोती,तँय मोर सोना  रे। कर डारे जिनगी मा,तँय मोर रोना रे।।-2 मोर सहीं मयावाला तैं  दिलवाला.. कहाँ पाबे रानी रे... कहाँ पाबे रानी रे.... कहूँ तँय मोला छोड़ के जाबे रानी रे.. पछताबे रानी रे पछताबे रानी रे.. मोर सहीं मयावाला तैं  दिलवाला.. कहाँ पाबे रानी रे... कहाँ पाबे रानी रे.... गीतकार डी.पी.लहरे"मौज" कवर्धा छत्तीसगढ़

करमा ताल सैड सांग मोर सपना ला करे चूरचूर कइसे मोर ले तँय होगे दूर-दूर।-2 बताना रानी रे हे मोर का कशूर-2 अंतरा(1) टोरना रहिसे रिश्ता ला,त काबर मोला रिझाये। जहर जुदाई वाले ओ,काबर मोला पियाये।।-2 कइसे तड़पे बर करे मजबूर-2 बताना रानी रे हे मोर का कशूर मोर सपना ला...... अंतरा-(2) मोर मया के बदला मा,मोला अतका दगा झन दे। मर जाहू अलग होगे,मोला अतका सजा झन दे।-2 तहू रोबे मोला छोड़ के जरूर-2 बताना रानी रे हे मोर का कशूर-2 गीतकार- डी.पी.लहरे"मौज" कवर्धा छत्तीसगढ़

*मानव समाज बर सदगुरू बाबा घासीदास जी के 42 अमरित वाणी* छंदकार-डी.पी.लहरे "मौज" दोहा+चौपाई छंद *अमृत वाणी (१)* *सत्य ही मानव का आभूषण है..* सत्य नाम हिरदे बसा,सत्य जगत मा सार। मनखे के गहना इही,कहिथे गुरू हमार। *गुरुघासी के अमरित बानी,* *बनगे जग मा अमर कहानी।* *बाबा जी के एही कहना,* *सत हावय मनखे के गहना।।* सत ले ए धरती खड़े,सत ले खड़े अगास। चाँद सुरुज सत मा चलै,जग ला करय उजास। अंतस मा सतनाम बसालौ। गुरु घासी के गुन ला गालौ। मनखे गहना सत ला जानौ। गुरु बाबा के कहना मानौ।। सत मा जे मनखे चलै,ओखर नइया पार। मिलय शांति सुख हा सदा,होवय मन उजियार।। *अमृत वाणी(२)* *मानव-मानव एक समान...* मनखे मनखे एक हे,नइ हे कोनो भेद। जाति भरम के भूत ला,मन ले देवव खेद। *मनखे-मनखे एक बताये,* *छुआ-छूत ला दूर भगाये।* *तोर पाँव के धुर्रा चंदन,* *सदगुरु बाबा तोला वंदन।।* सब मनखे ले राख लौ,दया मया के भाव। मिलके राहव संग मा,समता सुमता लाव।। सब मनखे ला एक्कै जानौ। भाई चारा सुमता लानौ। जात पात के बँधना टोरौ। सब मनखे ले नाता जोरौ।। गुरु बाबा कहिथे सदा,सब के एक्के जात। मिलके राहव जी बने,बिना करे आघात।। *अमृत वाणी(३)*...

विरह गीत मोर यार दिवाणी रे,मोर मया मा जाहर घोरे..2 पखरा समझ के ए हिरदे ला-काबर टोरे-फोरे..2 अंतरा-1 धधकत हावय ए छाती हा,बरसे आगी गोला। तोर बिरह मा दगाबाज ओ,लेशावत हे चोला। ए जिनगी ला दुख दहरा मा-काबर तँय हा बोरे मोर यार दिवाणी रे,मोर मया मा जाहर घोरे..2 अंतरा-2 आस रहिस ओ तोर हाथ मा,पहिराये के कँगना। जीवन साथी अपन बनाके,लाये के घर अँगना।। मया बढ़ाके छोड़े मोला-दूसर ले नाता जोरे.. मोर यार दिवाणी रे,मोर मया मा जाहर घोरे..2 अंतरा-3 मोर दरद ला कौन समझही,तरतर रोवय नैना। तोर बिना मँय कइसे जीहूँ,लूटे तँय सुख चैना।। बने बँधाये मया के बँधना-काबर छिन मा छोरे... मोर यार दिवाणी रे,मोर मया मा जाहर घोरे..2 डी.पी.लहरे"मौज" कापी राईट कवि,गीतकार,ग़ज़लकार, छन्दकार व्याख्याता शा.उ.मा.वि.इंदौरी कवर्धा छत्तीसगढ़